सोलापूर : मूकबधिर
विद्यार्थ्यांना वाचासिद्धीसाठी रोपळे (पंढरपूर) येथील सुप्रभात ग्रुपतर्फे प्रजासत्ताक दिनाचे औचित्य साधून सामूहिक श्रवण यंत्र भेट दिले.
येथील सुप्रभात ग्रुपतर्फे नेहमीच विधायक कामाला प्राधान्य दिले जाते. बाभूळगावातील मूकबधिर विद्यालयाला सामूहिक श्रवण यंत्राची गरज होती. त्यासाठी गेल्या वर्षभरापासून शिक्षकांकडून प्रयत्न केले जात आहेत; मात्र या प्रयत्नांना यश मिळत नव्हते. रोपळेतील सुप्रभात ग्रुपच्या सदस्यांना विद्यालयाची या यंत्राची गरज असल्याचे निदर्शनास आले. त्यांनी स्वतः आर्थिक भार उचलून हे यंत्र खरेदी केले.
याकामी निवृत्त कृषी पर्यवेक्षक मधुकर गुंजाळ यांनी पुढाकार घेतला. त्यांना सुप्रभात ग्रुपचे अध्यक्ष नागनाथ माळी, मोहन काळे, दादा कदम, डॉ. महावीर शहा, डॉ. हनुमंत खपाले, पोपट भोसले, दत्तात्रय भोसले, बाळासाहेब भोसले, किशोर महामुनी, जनार्धन काकडे, संजय कुलकर्णी यांनी साथ दिली.
‘या सामूहिक श्रवण यंत्रामुळे मूकबधिर विद्यार्थांना वर्गात शिकवताना ऐकू येण्यास मदत होणार आहे. ऐकू येणारी मुले हळू-हळू बोलायलाही शिकतील,’ असा विश्वास मुख्याध्यापक चित्रसेन पाथरूट यांनी सांगितले.
या श्रवण यंत्राचे उद्घाटन जनार्धन काकडे यांच्या हस्ते करण्यात आले. कार्यक्रम यशस्वीतेसाठी तानाजी कुंभार, मधुकर भोसले, अर्जुन नंदूरे, महादेव खरसडे, सुनील गुज्जलवार आदींनी प्रयत्न केले.